Franca po përballet me një nga zjarret më të mëdha pyjore në dekadat e fundit. Flakët pranë Bordeaux kanë detyruar autoritetet të evakuojnë mbi 220 mijë njerëz në jugperëndim të vendit.
Vetëm gjatë natës së fundit, rreth 55 mijë banorë janë larguar nga zonat e prekura në rajonin e Gironde. Zjarri ka shkatërruar rreth 42 mijë hektarë pyje në këtë zonë.
Që nga fillimi i vitit, në të gjithë Francën janë shkatërruar afro 98 mijë hektarë sipërfaqe pyjore, sipas raportimeve nga Reuters.
Në operacionet për shuarjen e zjarreve, janë angazhuar mijëra zjarrfikës, ushtarakë dhe pjesëtarë të policisë. Autoritetet paralajmërojnë se situata mbetet e vështirë, për shkak të përhapjes së paparashikueshme të flakëve.
Si pasojë e zjarreve, një pjesë e autostradës A63 drejt Spanjës është mbyllur, ndërsa aeroporti i Bordeaux ka regjistruar vonesa dhe anulime fluturimesh.
Presidenti Emmanuel Macron ka premtuar mbështetje për zonat e prekura dhe rindërtimin e dëmeve të shkaktuara nga kjo katastrofë natyrore.
You must be logged in to post a comment Login