Numërohet veç një kuti nga votat me postë – këto janë rezultatet

Vazhdon numërimi i votave në Qendrën e Numërimit dhe Rezultateve, me votat që po mbërrijnë nga përfaqësitë diplomatike si dhe ato me postë.

Sipas rezultateve të deritashme të publikuara në platformën e Komisionit Qendror të Zgjedhjeve (KQZ), deri tani është numëruar vetëm një kuti votash nga gjithsej 57 për votat me postë. Lëvizja Vetëvendosje (LVV) ka marrë 315 vota, që përbën 78.75% të totalit.

Në vendin e dytë renditet Lidhja Demokratike e Kosovës (LDK), e cila ka siguruar 65 vota ose 16.25%, ndërsa Partia Demokratike e Kosovës (PDK) ka arritur në 17 vota, që përbën 4.25%.

Është e rëndësishme të theksohet se Aleanca ka marrë gjithsej dy vota, kurse partia e turqve të Kosovës, KDTP, ka siguruar një votë.

Në anën tjetër, nga numërimi i votave që janë mbledhur nga përfaqësitë diplomatike, janë numëruar 46 nga 47 vendvotime, që përbën një përqindje prej 97.87%. Nga këto vota, LVV ka siguruar 18,282 vota ose 83.25%, me PDK në vendin e dytë me 1,561 vota (7.11%) dhe LDK me 1,458 vota (6.64%).

Aleanca ka arritur të marrë 454 vota, që përbën 2.07%.

Sipas rezultateve preliminare, LVV aktualisht ka siguruar 50 mandate me 44.09%. PDK renditet në vendin e dytë me 23 ulëse (20.82%), ndërsa LDK është në vendin e tretë me 19 ulëse (17.07%) dhe Aleanca me 8 ulëse (7.09%).

Të gjitha rezultatet mund të gjenden në platformën e KQZ-së.