Një person me inicialet I.M. është arrestuar të dielën në Zveçan, nën akuzat për përfshirje në sulmet ndaj pjesëtarëve të KFOR-it dhe Policisë së Kosovës që ndodhën në maj të vitit 2023.
Sipas një komunikate të përbashkët nga Prokuroria Speciale dhe Policia e Kosovës, arrestimi u krye nga hetuesit e Drejtorisë për Hetimin e Krimit të Organizuar dhe Krimeve të Rënda, me urdhër të Prokurorisë Speciale.
I.M. dyshohet për disa vepra penale, përfshirë sulmin ndaj personit zyrtar, pjesëmarrjen në turmë që kryen vepra penale dhe huliganizëm, si dhe bashkimin për veprimtari kundërkushtetuese. Ai gjithashtu e rrezikon sigurinë e personave nën mbrojtje ndërkombëtare.
Arrestimi ka ndodhur pas një serie veprimesh hetimore mbi ngjarjet e majit 2023, kur KFOR-i dhe Policia e Kosovës u sulmuan në veriun e vendit.
Prokuroria Speciale dhe Policia e Kosovës kanë njoftuar se do të vazhdojnë me veprimet e nevojshme procedurale, në përputhje me ligjin dhe standardet ndërkombëtare.
You must be logged in to post a comment Login