Cila është gjëja më e mirë për të pirë në këtë vapë: Ujë, izotonikë, elektrolite…?

Alarmet për mot të nxehtë janë lëshuar për shkak të kulmit të valës së të nxehtit. Të gjithë qytetarët, veçanërisht ata që janë në grupe të ndjeshme, rekomandohet të qëndrojnë në ambiente të freskëta dhe të kujdesen për hidratimin e trupit.

Ekspertët theksojnë se në temperatura të larta është thelbësore zëvendësimi i lëngjeve dhe elektroliteve, të cilat humben përmes djersitjes. Uji mbetet zgjedhja kryesore për hidratuar, dhe këshillohet konsumimi i tij të shpeshtë, madje edhe kur nuk ndihet etje.

Përveç ujit, rekomandohen pijet që ndihmojnë në rikthimin e elektroliteve, si uji i kokosit dhe pijet izotonike, të cilat përmbajnë natrium, kalium dhe magnez. Megjithatë, ekspertët këshillojnë kujdes me pijet sportive për shkak të përmbajtjes së lartë të sheqerit.

Edhe çajrat bimorë të ftohtë, pa kafeinë, si kamomili dhe menteja, si dhe lëngjet natyrale pa sheqer të shtuar, sidomos ato nga fruta dhe perime me përmbajtje të lartë uji, si shalqiri, kastraveci dhe portokalli, janë të rekomanduara.

Ekspertët paralajmërojnë se konsumimi i alkoolit në këto temperatura nuk është i rekomanduar, pasi rrit dehidratimin dhe ndikon në aftësinë e trupit për të rregulluar temperaturën. Po ashtu, pijet me kafeinë dhe ato shumë të ëmbla mund ta përkeqësojnë humbjen e lëngjeve dhe të ndikojnë në cilësinë e gjumit.

Ushqimet si akullorja dhe kafeja e ftohtë gjithashtu duhet të konsumohen me masë për shkak të përmbajtjes së lartë të sheqerit dhe ndikimit të tyre në dehidratim.

Sipas ekspertëve, gjatë verës rekomandohet të ndiqet një dietë e lehtë dhe e bazuar në stilin mesdhetar, e cila përmban ushqime të freskëta, ndihmon trupin të përballojë më lehtë temperaturat e larta.