Policia e Irlandës Veriore po heton vendosjen e një maketi të xhamisë mbi një grumbull paletash, të cilat ishin përgatitur për një zjarr tradicional. Ky veprim po trajtohet si një krim i mundshëm urrejtjeje.
Një burrë 56-vjeçar është arrestuar me akuza për shfaqjen e materialeve kërcënuese, fyese ose denigruese dhe për momentin ndodhet në paraburgim, sipas njoftimit nga Shërbimi Policor i Irlandës Veriore.
Tradita e zjarrvënies në Irlandën Veriore, gjatë festimeve të “12-tës” (Twelfth), përkujton Betejën e Boyne-it të vitit 1690, kur mbreti protestant William III mposhti mbretin katolik James II. Këto zjarrvënie historikisht shërbenin për t’u treguar rrugën anijeve që i përkisnin Williamit.
Policia ka marrë thirrje për të ndërmarrë masa ndaj shfaqjes së këtyre zjarreve. Në një deklaratë, Shërbimi Policor i Irlandës së Veriut (PSNI) njoftoi se incidenti në zjarrin e madh të Moygashel po trajtohet si një vepër penale e motivuar nga urrejtja dhe se po vlerësojnë situatën.
Arrestimi i burrit përkatës ka ndodhur më herët sot, dhe ai vazhdon të mbahet në paraburgim policor. Maketi, që përmban një figurë personi duke mbajtur një thikë dhe një flamur, është vendosur në majë të zjarrit në Moygashel, qarku i Tyrone-it, dhe ka sjellë reagime të shumta, duke u dënuar gjerësisht si një nxitje urrejtjeje.
Përveç maketit, në pirgun e drurëve janë vendosur pankarta me mbishkrimet: “Siguroni kufijtë tanë” dhe “Jepini fund kërcënimit të Islamit radikal”. Shoqata e Zjarrit Tradicional të Moygashelit e ka quajtur këtë vendosje një “akt proteste politike” përballë, siç pretendohet, “emigrimit masiv të pakontrolluar dhe të paligjshëm”.
You must be logged in to post a comment Login