Humbi bashkëshorten në aksidentin në autostradë, kjo është gjendja e burrit të lënduar

Një grua ka humbur jetën dhe një burrë ka pësuar lëndime të rënda në një vetaksident që ndodhi në autostradën “Ibrahim Rugova” dje.

Si pasojë e lëndimeve, burri është transportuar në Qendrën Klinike Universitare të Kosovës (QKUK), ku i është nënshtruar një operacioni. Pas procedurës, ai është dërguar në Mjekimin Intensiv Qendror.

Për gjendjen e tij shëndetësore, ka folur Shaqir Uka, shef i Mjekimit Intensiv, i cili ka deklaruar se gjendja e pacientit është stabilizuar. Ai tha për Klankosova.tv se pacienti është sjellë për trajtim dhe aktualisht është në proces të trajtimit të mëtejshëm në Klinikën e Maksillofaciale.

Ngjarja ka shkaktuar reagime të ashpra dhe dyshohet se aksidenti ka ndodhur si rezultat i rrëshqitjes së dheut në atë zonë.