Zjarr i fuqishëm në Kanada, mijëra banorë largohen nga shtëpitë

Mijëra njerëz janë detyruar të lënë shtëpitë e tyre për shkak të një zjarri të fuqishëm pyjor, i cili po përhapet me shpejtësi në pjesën perëndimore të Kanadasë.

Zjarri, i njohur si Bald Range, ka dyfishuar sipërfaqen e tij që nga zbulimi mëngjesin e së premtes. Sipas Shërbimit të Zjarreve Pyjore të British Columbia-s, flakët tani kanë përfshirë më shumë se 95 kilometra katrorë në zonat e Summerland dhe Okanagan-Similkameen.

Erick Thompson, një zyrtar i emergjencave në Distriktin Rajonal të Okanagan-Similkameen, e përshkroi situatën si një nga zjarret më të shpejtë dhe më të mëdhenj që ka parë ndonjëherë në këtë rajon, i cili shpesh përballet me zjarre pyjore.

Autoritetet njoftuan se, mëngjesin e së shtunës, zjarri vazhdonte të ishte jashtë kontrollit. Ekipet e emergjencës po punojnë intensivisht për të frenuar përhapjen e flakëve, ndërsa banorët e zonave të rrezikuara janë urdhëruar të evakuohen.