Dhimbja e luftës vazhdon të ndikojë thellë në jetën e shumë të mbijetuarve në Kosovë. Një nga ta është Shehrije Balaj nga Bllagaja e Pejës, e njohur si e mbijetuara e parë e dhunës seksuale gjatë luftës që guxoi të dëshmojë publikisht dhe të përballet me dhunuesit e saj në një sallë gjykimi në Beograd.
Ajo ndau përvojën e saj traumatike para gjykatës në vitin 1999, duke kontribuar në dënimin e kriminelëve serbë. Megjithatë, emri dhe historia e saj u bënë të njohura vetëm pas vdekjes.
Shehrije Balaj ndërroi jetë në vitin 2018 në kushte të vështira ekonomike dhe shëndetësore, pa arritur asnjëherë të gëzojë statusin e të mbijetuarës së dhunës seksuale gjatë luftës, si dhe pa marrë mbështetje institucionale.
Sot, kujtimi për të jeton në zemrat e dy fëmijëve që la pas. Djali i saj, Haxhi Balaj, e përshkruan atë si një grua të fortë, e cila punoi pandërprerë për të mbajtur familjen.
“Ka qenë si burrë, vetë burrë e vetë grua. Më së shumti ka qenë me neve,” rrëfen ai për emisionin “MAT” në Klan Kosova.
You must be logged in to post a comment Login