Zelensky njofton për zëvendësimin e kryeministres ukrainase

Presidenti i Ukrainës, Volodymyr Zelensky, njoftoi më 12 korrik se ka planifikuar të zëvendësojë kryeministren Yulia Svyrydenko si pjesë e një riorganizimi të gjerë të Qeverisë. Ai theksoi se këto ndryshime janë të nevojshme për implementimin e një strategjie politike të azhurnuar.

Në një postim në Telegram, Zelensky e falënderoi Svyrydenkon për kontributin e saj në postin e kryeministres. Ai gjithashtu bëri të ditur se i ka propozuar një detyrë të re, e cila lidhet me marrëdhëniet me një nga partnerët ndërkombëtarë të Ukrainës, pa dhënë detaje të mëtejshme për këtë rol.

“Pres të bashkëpunoj me deputetët për të realizuar ndryshimet e nevojshme në Qeverinë e Ukrainës,” shkroi ai.

Zelensky sqaroi se riorganizimi ka si qëllim rifreskimin e përbërjes së Kabinetit të Ministrave dhe se përgjegjësitë për politikën e jashtme do t’u besohet zyrtarëve me përvojë përkatëse. Ai gjithashtu njoftoi për ndryshime në drejtimin e disa agjencive të zbatimit të ligjit, por nuk specifikoi se cilët zyrtarë do të preken nga këto ndryshime.

Pas kësaj, Svyrydenko shkroi në platformën X se ka diskutuar me Zelenskyn për ndryshimet e planifikuara në Qeveri dhe për “hapat e ardhshëm”.

Sipas ligjit ukrainas, dorëheqja e kryeministrit duhet të miratohet nga Parlamenti. Nëse deputetët e pranojnë, të gjithë kabineti është i detyruar të japë dorëheqje dhe më pas duhet të formohet dhe të votohet një ekzekutiv i ri.

Para emërimit si kryeministre në korrik 2025, Svyrydenko kishte shërbyer si zëvendëskryeministre e parë dhe ministre e Ekonomisë, ku luajti një rol të rëndësishëm në politikën ekonomike të Ukrainës dhe në negociatat me partnerët ndërkombëtarë.

Gjatë këtij viti, ajo nënshkroi marrëveshjen SHBA-Ukrainë për mineralet në emër të Qeverisë ukrainase, pas disa muajsh negociatash mes Kievit dhe Uashingtonit.

Emërimi i Svyrydenkos vitin e kaluar ishte pjesë e një riorganizimi të madh të Qeverisë, që ishte më i gjeri që nga fillimi i pushtimit rus në shkurt 2022, kur u zëvendësuan disa ministra dhe kryeministri.

Zelensky nuk ka përmendur ndonjë emër si pasardhës të Svyrydenkos dhe as ka dhënë një afat kohor për riorganizimin, duke theksuar vetëm se do të kërkojë miratimin e Parlamentit.