Presidenti i Serbisë, Aleksandar Vuçiq, vazhdon të përdorë një gjuhë kërcënuese dhe nacionaliste. Gjatë një fjalimi më 25 korrik, ai iu drejtua oficerëve të rinj ushtarak, duke theksuar nevojën për të mbrojtur integritetin territorial të Serbisë.
Në fjalimin e tij, Vuçiq e paraqiti Kosovën si një pjesë të Serbisë. Kjo deklaratë ka shkaktuar reagimin e Ambasadës gjermane në Prishtinë, e cila rikujtoi se Gjermania ka njohur pavarësinë dhe sovranitetin e Kosovës që nga viti 2008.
Një zëdhënës i kësaj ambasade theksoi se Gjermania mbetet e angazhuar për të mbështetur integrimin evropian të Kosovës. Ai theksoi: “Gjermania e ka njohur Kosovën si shtet të pavarur që nga viti 2008 dhe mbetet e përkushtuar në mbështetje të sovranitetit të saj. Për përparim në këtë rrugë, Kosova dhe Serbia duhet të vazhdojnë normalizimin e marrëdhënieve përmes dialogut. U bëjmë thirrje të gjitha palëve që të përmbahen nga deklaratat dhe veprimet që pengojnë këtë objektiv.”
Edhe Bashkimi Evropian ka shprehur kritikë ndaj Vuçiqit. BE-ja ka bërë thirrje për shmangie të deklaratave që nuk ndihmojnë në normalizimin e marrëdhënieve mes Serbisë dhe Kosovës, duke theksuar se dialogu është e vetmja rrugë drejt përparimit.
Zëdhënësi i Komisionit Evropian tha: “Vetëm përmes dialogut mund të arrijmë përparim në normalizimin e marrëdhënieve ndërmjet Kosovës dhe Serbisë. Duhet të shmangen deklaratat dhe veprimet që nuk kontribuojnë në këtë qëllim.” Ai gjithashtu theksoi se përparimi në dialogun mes Beogradit dhe Prishtinës është një parakusht për të dyja palët në rrugën e tyre evropiane.
You must be logged in to post a comment Login