Aktori i njohur turk, Serhat Mustafa Kiliç, është gjetur pa jetë në apartamentin e tij në lagjen Kagıthane të Stambollit. Rrethana të vdekjes mbeten ende të paqarta, dhe autoritetet nuk kanë bërë të ditur shkakun e saktë të ndodhisë.
Sipas raportimeve nga mediat turke, partnerja e aktorit kishte shqetësime pasi nuk kishte mundur të kontaktonte me të për disa ditë. Ajo shkoi në apartamentin e tij, ku zbuloi trupin e Kiliçit në divanin e dhomës së ndenjes.
Policia dhe ekipet mjekësore u thirrën menjëherë në vendngjarje. Pas mbërritjes, ato konfirmuan vdekjen e aktorit. Partnerja e tij i tha autoriteteve se Kiliç kishte vuajtur nga kanceri dhe disa media raportojnë se ai kishte pasur gjithashtu probleme me gjëndrën tiroide.
Megjithatë, deri tani nuk ka një konfirmim zyrtar se këto probleme shëndetësore janë shkaku i vdekjes së tij. Shkaku i saktë pritet të përcaktohet pas përfundimit të procedurave mjeko-ligjore dhe hetimeve nga autoritetet.
You must be logged in to post a comment Login