Pamjet e tragjedisë që ndodhi në Roskovec, Shqipëri, janë publikuar, duke ilustruar momentet e operacionit të forcave speciale RENEA. Këto forca rrethuan automjetin ku ndodhej 35-vjeçari Refit Buzi, pas pengmarrjes së 24-vjeçares Rozalinda Plaku.
Në videon e publikuar, duken efektivët e RENEA-s dhe negociatorët e Policisë së Shqipërisë. Ata kaluan disa orë duke u përpjekur të bindin të dyshuarin të dorëzohej dhe të lirojë të renë. Në vendngjarje ishin gjithashtu drejtues të Policisë së Fierit dhe prokurorë të Prokurorisë së Fierit, që ndihmuan në monitorimin e operacionit.
Megjithë përpjekjet e vazhdueshme të negociatorëve për të ndalur situatën pa pasoja, Refit Buzi refuzoi të dorëzohej. Pas një operacioni të gjatë dhe delikat, 24-vjeçarja Rozalinda Plaku është liruar e padëmtuar dhe është dërguar në një zonë të sigurt.
Negociatat mes punonjësve të policisë dhe 35-vjeçarit vazhduan për disa orë, derisa ky i fundit i dha fund jetës brenda makinës. Ngjarja e rëndë nisi në orët e para të mëngjesit të së premtes, në fshatin Vidhisht të Roskovecit. Refit Buzi shkoi në banesën e ish të fejuarës së tij dhe qëlloi me armë ndaj prindërve të saj.
Si pasojë e të shtënave, dy prindërit e 24-vjeçares humbën jetën. Më pas, autori e mori peng të rinjën dhe u largua me automjet. Për disa orë, dhjetëra forca policie, bashkë me efektivët e RENEA-s dhe negociatorët, zhvilluan një operacion të gjerë për lokalizimin dhe izolimin e të dyshuarit, me synimin për ta zgjidhur situatën pa rrezikuar jetën e saj.
Pas lirimit të Rozalinda Plakut, operacioni përfundoi me gjetjen e pajetë të 35-vjeçarit brenda automjetit. Ndërkohë, grupi hetimor vazhdon hetimet për të dokumentuar plotësisht dinamikën e ngjarjes dhe motivet që çuan në këtë tragjedi, e cila është cilësuar si një nga krimet më të rënda në qarkun e Fierit.
You must be logged in to post a comment Login