Një 20-vjeçar është arrestuar nga Policia e Tiranës, nën dyshimin se ka kryer tetë vjedhje në subjekte të ndryshme brenda një jave. Ai ndodhej nën masën e sigurisë “Arrest në shtëpi” për të njëjtën vepër penale.
Operacioni i koduar “Multiple” u finalizua nga shërbimet e Komisariatit të Policisë Nr. 4, në bashkëpunim me strukturat e tjera policore që vepruan në zonat ku ishin realizuar vjedhjet.
Sipas Policisë, i dyshuari, i identifikuar si O. H., ka kryer vjedhje para dhe produkte në tetë subjekte të ndryshme gjatë periudhës 5–13 gusht 2026.
Pas kallëzimeve nga disa qytetarë, uniformat blu zbuluan se 20-vjeçari ishte aktualisht nën masën e sigurisë “Arrest në shtëpi”, të vendosur prej kohësh për vepra të ngjashme.
Policia vazhdon hetimet për të dokumentuar nëse 20-vjeçari është i përfshirë edhe në vjedhje të tjera në Tiranë. Materialet procedurale janë referuar Prokurorisë së Tiranës për veprime të mëtejshme.
Be the first to comment