Studimi: Shumë njerëz postojnë në rrjetet sociale që t’i shohë ish-partneri

Një zemër e thyer mund të na shtyjë të veprojmë në mënyra të çuditshme. Shumë persona, me një dozë turpi, pranojnë se kanë ndjekur ish-partnerët e tyre në Spotify për të parë se çfarë muzikë po dëgjonin, në përpjekje për të ndjerë një lidhje pas një ndarjeje. Po ashtu, janë të njohura përpjekjet për të postuar në Instagram me shpresën se ish-partneri do të shihte se sa mirë ndjeheshim pa të.

Sipas një sondazhi të fundit nga aplikacioni Hint, shumica e të rriturve ende imagjinojnë se ish-partnerët ndjekin jetën e tyre pas ndarjes. Sondazhi zbuloi se rreth 74% e të anketuarve mendojnë për reagimin e ish-partnerëve në lidhje me vendime të rëndësishme në jetë, ndërsa 68% e imagjinojnë se si do t’i përjetonin arritjet personale.

Gjithashtu, 59% e të anketuarve kanë postuar diçka në internet duke shpresuar që ish-i tyre do ta vinin re, dhe 52% pranojnë se kanë arritur diçka me qëllim për t’i bërë përshtypje ish-partnerit. Edhe pse të drejtohemi sipas mendimeve të ish-partnerëve nuk është një qasje shumë e shëndetshme, kjo sjellje konsiderohet më pak e dëmshme se ndjekja e vazhdueshme për një shans të dytë.

Pas kalimit të muajve ose viteve me dikë, personi bëhet një pjesë e rëndësishme e jetës sonë dhe procesit të vendimmarrjes. Ndarja shpesh sjell ndjesi varësie, pasi partnerët janë shoqëruesit tanë më të afërt dhe mbështetësit kryesorë. Prandaj, është e natyrshme që të vijojmë të ndajmë momente të rëndësishme me ata, një zakon që nuk është i lehtë për t’u thyer.

Kjo mund të shpjegojë pse 48% e të anketuarve e imagjinojnë ish-partnerin si personin e parë me të cilin ndajnë një arritje të madhe, përpara se me dikë tjetër në jetën e tyre aktuale. Imagjinata shpesh na lidh me një ish-partner edhe kur nuk jemi më në kontakt, duke krijuar një “audiencë të imagjinuar” për ta, dhe veprojmë sikur jetojmë për vëmendjen e tyre.

Sipas Kirill Liakh, drejtor i aplikacionit Hint, shumë njerëz po përpiqen të portretizojnë veten në një dritë të re për ata që dikur kishin autoritet emocional mbi ta.

Mediat sociale e komplikojnë situatën. Të ndjekësh vazhdimisht jetën e ish-partnerit tënd krijon një ndjesi të rreme lidhjeje, e cila mund të mos ekzistojë më. Sipas anketës, 61% e të anketuarve besojnë se platformat sociale e bëjnë më të vështirë ndarjen emocionale përfundimtare.

“Megjithatë, shumë njerëz nuk e shohin kapërcimin e një ndarjeje si një proces të thjeshtë emocional,” thotë Liakh. “Një ish-partner mund të mos jetë më pjesë e jetës së përditshme, por ende mbetet një masë për të gjykuar ndryshimet e tyre.”

Kjo është veçanërisht e dukshme në platforma si Instagram dhe Snapchat, ku është e lehtë të ndjekësh ish-partnerët ose të publikosh përmbajtje me ndjesi të veçanta për ta. Mjafton të pyesim veten: sa herë keni postuar një foto apo një ngjarje me dëshirën e fshehtë që ish-i juaj ta vërë re? Edhe nëse nuk ka qenë arsyeja kryesore, një motiv i tillë shpesh është i pranishëm.

Shumë prej nesh nuk do ta pranojnë se e kanë bërë këtë, dhe disa madje mund të mos jenë të vetëdijshëm për motivet tona të vërteta. Edhe nëse disa e kanë kaluar këtë sjellje, është njerëzore të dëshirosh vëmendjen e dikujt që kishte rëndësi në jetën tonë. Megjithatë, çelësi është të mos lejojmë që jeta jonë të cilësohet nga nevoja për miratim nga ata që nuk janë më pjesë e saj.