Spitali i Përgjithshëm në Pejë ka dhënë detaje në lidhje me aksidentin e rëndë të trafikut, i cili ndodhi pasditen e sotme në Istog. Si pasojë e këtij aksidenti, dy persona humbën jetën, ndërsa katër të tjerë u lënduan.
Sipas njoftimit të spitalit, rreth orës 16:00 në Shërbimin e Emergjencës u pranuar një paciente pa shenja jete, e cila kishte pësuar politraumë. Përkundër përpjekjeve të vazhdueshme të ekipit mjekësor, është konstatuar vdekja e saj.
Rreth 30 minuta më vonë, në Emergjencë u pranuan edhe katër të lënduar nga i njëjti aksident, siç informon Klankosova.tv.
Një fëmijë me lëndime të rënda është transferuar në Qendrën Klinike Universitare të Kosovës (QKUK). Ai ishte intubuar dhe nën përcjelljen e ekipit të Anestezionit. Mjekët e kanë diagnostikuar atë me politraumë, hemorragji intrakraniale dhe frakturë të femurit.
Një paciente tjetër është hospitalizuar në Repartin e Ortopedisë me frakturë të femurit, ndërsa dy persona të tjerë, pas marrjes së trajtimit mjekësor, janë liruar për trajtim ambulantor, pasi janë konstatuar me lëndime të lehta trupore.
Spitali i Përgjithshëm në Pejë shprehu ngushëllimet e tij për familjen e viktimës dhe uruan shërim të shpejtë për të lënduarit.
Be the first to comment