Shtiu dy herë në një aheng, arrestohet pejani

Policia e Kosovës ka njoftuar se sot në Pejë është arrestuar një person, i cili dyshohet se ka shtënë me armë zjarri gjatë një ahengu.

Ngjarja ka ndodhur rreth orës 12:45, pas informacioneve të marra, policia ka dalë në vendin e ngjarjes në rrugën “Brigada Adrian Krasniqi”.

Sipas njoftimit, policia ka takuar të dyshuarin dhe ka sekuestruar prej tij një armë Retay, dy gëzhoja dhe një karikator. Pas arrestimit, i dyshuari është intervistuar nga hetuesit dhe me vendim të prokurorit është liruar në procedurë të rregullt.

Në lidhje me këtë rast është iniciuar procedimi për veprën penale “mbajtja në pronësi, kontroll ose posedim i paautorizuar i armës, përdorimi i armës apo mjeteve të rrezikshme”.

Drejtoria Rajonale e Policisë në Pejë apelon te të gjithë qytetarët që, gjatë organizimit të ahengjeve dhe festimeve të tjera, të përmbahen nga përdorimi i armëve. Policia e Kosovës do të ndërmarrë masa ndaj atyre që përdorin armë në mënyrë të kundërligjshme.