Një moment i pazakontë ndodhi gjatë gjysmëfinales së Kupës së Botës, kur regjisorët e transmetimit ndërkombëtar u përqendruan më shumë te Shakira, duke humbur disa sekonda nga aksioni në fushë.
Këngëtarja kolumbiane ndodhej në tribunat VIP të stadiumit në Boston, duke ndjekur nga afër sfidën që u fitua 2-0 nga Franca ndaj Marokut. Ajo u shfaq në ekran pak pas minutës së 40-të, gjatë një ndërprerjeje të lojës. Megjithatë, pas rifillimit, kamerat vazhduan të fokusoheshin te artistja, duke lënë jashtë transmetimit disa momente të rëndësishme të lojës.
Në Shtetet e Bashkuara, sfida transmetohej nga Fox, transmetuesi zyrtar i Kupës së Botës. Komentatori John Strong e theksoi situatën menjëherë, duke thënë: “Loja ka rifilluar. Brahim Diaz pati një mundësi për të avancuar, por Jules Kounde e ndali.” Ai shtoi se duket se drejtuesit e transmetimit nuk e kishin kuptuar menjëherë se topi ishte ende në lojë.
Incidenti u komentua gjerësisht në rrjetet sociale, ku shumë tifozë e kritikuan regjisorët për humbjen e aksionit, ndërsa të tjerë e morën situatën me humor.
Shakira pritet të jetë sërish në qendër të vëmendjes gjatë finales së Kupës së Botës, pasi është konfirmuar si një nga artistët që do të performojë në spektaklin e pjesës së pushimit më 19 korrik në East Rutherford, New Jersey. Aktualisht, artistja 49-vjeçare ndodhet në turne në Amerikën e Veriut, me koncerte të planifikuara në Boston, New York dhe New Jersey, para dhe pas performancës së saj në finalen e Botërorit.
Be the first to comment