Edi Rama ka reaguar ashpër ndaj kritikave dhe kundërshtimeve për projektin gjigant turistik në Zvërnec dhe ishullin e Sazanit, duke i cilësuar ato si propagandë dhe konkurrencë ndaj zhvillimit të turizmit shqiptar.
Projekti miliardësh i kompanisë Affinity Partners, e drejtuar nga Jared Kushner, dhëndri i presidentit amerikan Donald Trump, pritet të transformojë rivierën shqiptare në një nga destinacionet më luksoze turistike në rajon.
Sipas raportimeve, investimi kap vlerën e rreth 4 miliardë eurove dhe pritet të ndikojë ndjeshëm në ekonominë shqiptare gjatë viteve të ardhshme.
Megjithatë, projekti ka nxitur reagime dhe kritika, sidomos pas protestave të mbajtura në zonën e Zvërnecit dhe debatit mbi ndikimin mjedisor në zonën e Nartës dhe ishullin e Sazanit.
Rama deklaroi se sulmet ndaj këtij projekti vijnë edhe nga konkurrenca rajonale dhe interesa të jashtme që nuk e duan forcimin ekonomik dhe turistik të Shqipërisë.
“Ky projekt e ngre Shqipërinë në një nivel tjetër”, u shpreh kryeministri shqiptar, duke shtuar se vendi ka hyrë në një fazë të re zhvillimi dhe investimesh strategjike.
Sipas tij, Shqipëria po kthehet në një nga destinacionet më të kërkuara turistike në Europë, ndërsa Riviera shqiptare po tërheq gjithnjë e më shumë investitorë ndërkombëtarë dhe vizitorë nga e gjithë bota.
Debati për projektin vazhdon të mbetet i fortë, ku një pjesë e aktivistëve shprehin shqetësime për mjedisin, ndërsa mbështetësit e konsiderojnë atë si një nga investimet më të mëdha turistike në historinë e Shqipërisë.
You must be logged in to post a comment Login