Kryeministri i Shqipërisë, Edi Rama, ka garantuar qytetarët se Komisioni Europian është njohur në detaje me procesin administrativ lidhur me Sazanin e Zvërnecin. Ai theksoi se Komisionerja Marta Kos ka shprehur qartë pikëpamjet e saj për ata që kërkojnë fakte.
Në videon e publikuar nga kreu i qeverisë, Kos thekson se është në kontakt të vazhdueshëm me Ramën. Ajo ka dhënë garanci se do të realizohet një vlerësim i plotë dhe se standardet evropiane për mjedisin do të respektohen.
“Ne kemi marrë garanci nga Qeveria e Shqipërisë se do të kryhet një vlerësim i plotë i ndikimit në mjedis dhe se standardet europiane të mjedisit do të respektohen. Fakti që kjo po ndodh ndërkohë që Shqipëria është në procesin e anëtarësimit është i rëndësishëm. Ky proces është juridikisht dhe politikisht detyrues, si dhe nënvizohet nga monitorimi dhe vlerësimi i vazhdueshëm,” tha ajo.
Kos shtoi se kjo përbën garancinë më të fortë për mbrojtjen e natyrës dhe mjedisit në Shqipëri sipas standardeve evropiane. Ajo gjithashtu theksoi rëndësinë e të drejtës për të protestuar, një e drejtë themelore në Bashkimin Europian dhe për të gjitha vendet që synojnë të bëhen pjesë e tij. “Jam e lumtur të shoh se kjo e drejtë respektohet në Shqipëri,” përfundoi ajo.
You must be logged in to post a comment Login