Natalia Belloli, gruaja e yllit të Barcelonës, Raphinha, ka reaguar ndaj thashethemeve mbi vështirësitë financiare të lojtarit, duke i quajtur ato të pabazuara. Ajo e bëri këtë për disa komente nga ish-lojtari i kombëtares braziliane, Andre Batista Santos, i njohur si Vampeta, i cili kishte thënë se Raphinha po kalon një krizë serioze familjare dhe financiare, duke e lidhur atë me një mundësi transferimi në ligën saudite.
Në një deklaratë për ‘Daily do Garotinho’, Belloli shprehu habitjen e saj për përhapjen e këtyre thashethemeve, duke theksuar se situata financiare e familjes së saj është e qëndrueshme. Ajo tha: “E gjej qesharake që duhet të flas për gjendjen time financiare. Edhe nëse merrnim vetëm 10% të asaj që fiton Raphinha sot, do të ishim ende shumë të bekuar.”
Belloli theksoi se nuk sheh nevojë për të adresuar spekulimet publike, për shkak të realitetit ekonomik me të cilin përballen shumë njerëz. Ajo shprehu gjithashtu keqardhje për shpërndarjen e thashethemeve përtej kufijve të Brazilit, duke arritur deri në Spanjë, ku shumë kanë filluar të besojnë se familja po kalon një krizë financiare të vërtetë.
Vampeta kishte pranuar se informacioni i tij nuk ishte i konfirmuar dhe se ishte thjesht një thashethem që kishte dëgjuar gjatë Kupës së Botës. Ai theksoi se burimet e tij ishin njerëz të afërt me rrethin e Barcelonës.
Deklaratat e tij shkaktuan një reagim të gjerë në Brazil, përfshirë një mesazh nga Igo Padilha, kushëriri i Raphinha-s, i cili i kërkoi Vampetës të sqaronte gënjeshtrat.
Ndërkohë, Raphinha po përqendrohet në rikuperimin nga një dëmtim muskulor që pësoi gjatë ndeshjes së Brazilit kundër Haitit, e cila përfundoi me fitoren e Brasilit 3-0. Rrethi i tij e ka mohuar kategorikisht çdo thashethem lidhur me situatën financiare.
You must be logged in to post a comment Login