Predikuesi islamik nga Bosnja pritet të dëbohet nga Kosova, çka thonë BIK-u dhe Komuna e Pejës?

Predikuesi islamik nga Bosnje e Hercegovina, Elvedin Peziq, pritet të dëbohet nga Kosova pas arrestimit të tij një ditë më parë. Ai u shoqërua nga Policia e Kosovës para një aktiviteti në Vitomiricë të Pejës, sipas një burimi të informuar për organizimin e qëndrimit të tij.

Nuk ka informacione të tjera rreth arsyes së shoqërimit të Peziqit. Policia e Kosovës nuk ka dhënë ende një përgjigje për kërkesën e Radion Evropa e Lirë (REL) për konfirmim dhe detaje të tjera.

Këshilli i Bashkësisë Islame të Kosovës, përmes një burimi të vet, ka deklaruar se nuk ishte njoftuar për ardhjen e Peziqit dhe aktivitetin e tij. Sipas Këshillit, Peziqi nuk kishte kërkuar leje për aktivitetin, as institucioni nuk kishte ofruar mbështetje materiale apo logjistike.

BIK-u ka konfirmuar se kanë pasur komunikim me Policinë lidhur me rastin, duke theksuar se çdo aktivitet fetar duhet të ketë pëlqimin e institucioneve përkatëse. Një xhemat nga Dobrushë kishte shpërndarë njoftime për aktivitetin e Peziqit në rrjetet sociale.

Komuna e Pejës gjithashtu ka deklaruar se nuk ka pasur rol në organizimin e aktivitetit për të cilin Peziqi kishte ardhur. Valmir Deqani, zëdhënësi i Komunës, tha se ngjarja ishte organizuar nga vetë komuniteti boshnjak në Vitomiricë.

Peziqi ishte shoqëruar për intervistim informues në polici një ditë para aktivitetit. Rexho Kojiq nga organizata “Vullnetarët e Rinj”, e cila ishte organizatore e aktivitetit, konfirmoi se Peziqi kishte hyrë në Kosovë me dokumentet e tij të Bosnje e Hercegovinës dhe se ai do të mbahej për verifikim identiteti.

Kojiq gjithashtu tha se Peziqi ishte pyetur nëse kishte leje nga Bashkësia Islame e Kosovës, duke theksuar se ai nuk ka nevojë për leje pasi nuk është hoxhë në ndonjë xhami. Aktiviteti ishte planifikuar për promovimin e një libri.

Edhe në aktivitetin e planifikuar duhet të merrte pjesë Mithad Qeman, një tjetër predikues islamik, i cili ndonëse ishte shoqëruar nga Policia, u lirua menjëherë. Të dy predikuesit kishin planifikuar të realizonin aktivitete në disa lokacione, përfshirë Dobrushën dhe Reçanin.

Elvedin Peziq është një predikues me ndjekës të shumtë në rrjetet sociale, njihet për qëndrime konservatore dhe ka pasur kritika të ndryshme për deklaratat e tij. Megjithatë, Kojiq tha se Peziqi nuk paraqet rrezik për sigurinë e Kosovës.

REL është në pritje të përgjigjes së Policisë për të sqaruar arsyet e shoqërimit dhe statusin e Peziqit në Kosovë.