Një ngjarje e dhunshme ka ndodhur të shtunën në mbrëmje në Vjenë, ku një 43-vjeçar nga Kosova është plagosur me thikë gjatë një përleshjeje me një 30-vjeçar, shtetas afgan.
Incidenti ndodhi rreth orës 20:00 në Sechshauser Gürtel, në distriktin Rudolfsheim-Fünfhaus. Sipas Policisë së Vjenës, mosmarrëveshja midis dy burrave ishte shkaku i përleshjes, e cila më vonë u përshkallëzua.
Gjatë përleshjes, 30-vjeçari dyshohet se e ka sulmuar kosovarin me thikë, duke i shkaktuar plagë në pjesën e sipërme të krahut të majtë dhe disa prerje në krahë dhe në gjoks.
Policët që ishin në patrullë pranë vendit të ngjarjes dëgjuan britmat dhe intervenuan menjëherë, duke i ndarë burrat. Në vendin e incidentit u sekuestrua një thikë xhepi, e cila dyshohet se është përdorur në ngjarje.
Pas intervenimit, kosovari u dërgua me ambulancë në spital, por lëndimet e tij nuk janë kërcënuese për jetën.
30-vjeçari afgan u arrestua fillimisht dhe iu vu një ndalim i përkohshëm për armëmbajtje, si dhe ndalim hyrjeje në zonën përreth Fritz-Imhoff-Park. Ai është proceduar nga prokuroria për lëndim të rëndë trupor, por më vonë është liruar.
Ndërkohë, edhe 43-vjeçari kosovar po hetohet nën dyshimin për përfshirje në sulm. Shkaku i konfliktit dhe rrjedha e saktë e ngjarjes mbetet ende në hetim.
You must be logged in to post a comment Login