Një fluturim rutinë testues ka bërë jehonë në rrjetet sociale, pasi një pilot i ri ka vendosur të përdorë itinerarin e avionit për të lënë një mesazh të pazakontë në radar.
Fjalët “I’m bored” (“Jam i mërzitur”) u shfaqën mbi qiejt e Anglisë dhe Uellsit, duke tërhequr menjëherë vëmendjen e përdoruesve të platformës Flightradar24.
Sipas The Guardian, piloti, një instruktor fluturimi në të njëzetat e tij nga kompania ajrore Ravenair, u nis të shtunën nga Liverpooli me një aeroplan të vogël të tipit Piper Tomahawk. Fluturimi kishte si qëllim verifikimin e funksionimit të avionit pas zëvendësimit të njërit prej cilindrave të motorit.
Gjatë fluturimit, pilotit iu deshën rreth 20 minuta për të formuar mesazhin mbi grykëderdhjen e lumit Dee. Ai operoi në një lartësi prej 335 metrash dhe me një shpejtësi prej afërsisht 100 nyjesh, duke kryer kthesa të ngushta dhe precize për të siguruar qartësinë e shkronjave në hartën e radarit.
Menaxheri i operacioneve të Ravenair, Wayne Barrett, konfirmoi se avioni funksionoi pa asnjë problem dhe se piloti nuk do të përballet me masa disiplinore. Ai ka vlerësuar aftësitë e pilotit në manovrimin e avionit.
Barrett theksoi se fluturimi kërkonte shumë aftësi. Ai beson se, edhe pse piloti mund të ketë qenë pak i mërzitur, kishte nevojë të përqendrohej maksimalisht për të formuar fjalët. Pas përfundimit të testimit, avioni u kthye i sigurt në hangar dhe pilotit iu dha një ditë pushim.
You must be logged in to post a comment Login