Presidenti i Shteteve të Bashkuara të Amerikës, Donald Trump, ka njoftuar se trafiku detar në Ngushticën e Hormuzit ka filluar të normalizohet. Kjo pas arritjes së një marrëveshjeje kornizë mes ShBA-së dhe Iranit.
Në një postim në platformën e tij Truth Social, Trump theksoi se anijet, përfshirë ato që transportojnë naftë, po lëvizin sërish në këtë rrugë detare të rëndësishme.
“Ato po udhëtojnë përgjatë ‘Autostradës’ Jugore, e cila është plotësisht e sigurt dhe e pastër. Ka edhe zona të tjera udhëtimi,” shkroi Trump.
Ngushtica e Hormuzit është e njohur si një nga korridoret më strategjikë për tregtinë globale të naftës, pasi një pjesë e konsiderueshme e eksporteve botërore të energjisë kalojnë përmes saj. Çdo zhvillim që ndikon në sigurinë e kësaj rruge detare ndjeket me vëmendje të madhe nga tregjet ndërkombëtare dhe vendet eksportuese të naftës.
Pritet që në orët dhe ditët e ardhshme të publikohen më shumë informacione mbi lëvizjen e anijeve dhe ndikimin e marrëveshjes SHBA-Iran mbi stabilitetin e rajonit dhe tregjet globale të energjisë.
You must be logged in to post a comment Login