Gjykata Themelore në Ferizaj ka miratuar kërkesën e Prokurorisë së Ferizajt për caktimin e masës së paraburgimit për të pandehurin N.B., i dyshuar për posedim dhe shitje të paautorizuar të narkotikëve.
Ngjarja në fjalë ka ndodhur më 19 gusht 2026, rreth orës 23:30, në Brezovicë të Shtërpcës. Policia është njoftuar nga qytetarët për praninë e një substance të dyshuar narkotike, të llojit marihuanë, në një vilë të pabanuar.
Pasi ka mbërritur në vendin e ngjarjes, ekipi policor ka vërejtur një person që po ikte në drejtim të malit. Pas një ndjekjeje, ata kanë arritur të ndalin të pandehurin N.B., i cili ishte duke lëvizur me një skuter “NAS”.
Gjatë kontrollit, është gjetur dhe sekuestruar nga N.B. një sasi e dyshuar narkotike, si dhe dy peshore digjitale. Gjithashtu, është kontrolluar edhe vila e një familjari të tij, ku është gjetur një sasi tjetër e marihuanës.
Në total, janë sekuestruar 1.063 gramë substance e dyshuar narkotike e llojit marihuanë, të ndara në disa qese. Po ashtu, janë marrë në dorëzim një çantë e zezë, dy peshore digjitale dhe një thikë metalike, për të cilat ka dyshime se ishin të destinuara për përgatitjen dhe ndarjen e substancës narkotike me qëllim shitjen.
Pas shqyrtimit të kërkesës së prokurorit dhe dokumenteve të lëndës, gjykatësi Ilir Bytyqi ka vlerësuar se ekziston dyshimi i bazuar për kryerjen e veprës penale dhe ka caktuar masën e paraburgimit për N.B. me një muaj.
Palët kanë të drejtë të bëjnë ankesë kundër këtij aktvendimi, por ankesa nuk e pezullon ekzekutimin e tij.
You must be logged in to post a comment Login