Teksa pacientët që trajtohen në klinikat e Qendrës Klinike Universitare të Kosovës (QKUK) vazhdojnë të përballen me mungesë barnash nga lista esenciale, duke u detyruar të blihen ato me shpenzimet e tyre, shpesh në çmime të larta, Shërbimi Spitalor Klinik Universitar i Kosovës (SHSKUK) ka përmbyllur procedurën për furnizimin me këto barna.
Në njoftimin e publikuar në platformën e prokurimit elektronik, është njoftuar se vlera e parashikuar e kontratës është 2,182,952.06 euro. Kontrata është zhvilluar përmes një procedure të hapur, ku afati për dorëzimin e ofertave ishte 18 qershori 2026. Publikimi i njoftimit për dhënien e kontratës u bë më 1 korrik 2026.
Ky furnizim ka si qëllim sigurimin e barnave nga lista esenciale për nevojat e institucioneve që operojnë brenda SHSKUK-së. Pjesa më e madhe e tenderit i është dhënë kompanisë DELTAPHARMA-KS, e cila ka fituar dy lote me një vlerë totale prej 1,238,846.40 euro. Kompania MEDITECH është shpallur fituese e dy loteve me vlerë prej 596,372.47 euro, ndërsa Dreni Pharm ka fituar një lot në vlerë prej 54,100.02 euro. Tenderi ishte hapur për furnizimin me barna nga Lista Esenciale.
Megjithatë, jo të gjitha lotet janë kontraktuar. SHSKUK-ja ka anuluar Lotin 1, pasi nuk është pranuar asnjë ofertë. Për më tepër, lotet 3, 6, 7 dhe 8 janë anuluar për shkak se ofertat e pranuara e tejkalonin dukshëm vlerën e parashikuar.
Mungesa e barnave në klinikat e QKUK-së është një problem i njohur, me shumë pacientë që përballen me shpenzime shtesë për blerjen e terapive në barnatore private, ndonëse barnat e listës esenciale duhet të ofrohen nga institucionet publike shëndetësore.
Ky tender pritet të sjellë përmirësime në furnizimin me barna, por do të mbetet për t’u parë nëse kontratat e nënshkruara do të ndikojnë shpejt në furnizimin e klinikave dhe në lehtësimin e barrës financiare për pacientët.
Be the first to comment