Një 78-vjeçar është dënuar me tetë vjet e tetë muaj burgim për tentativë vrasjeje ndaj bashkëshortes së tij, me të cilën kishte jetuar për më shumë se 33 vjet.
Sipas mediave britanike, Colin Finch sulmoi gruan e tij me thikë në shtëpinë e tyre në Darlington, gjatë muajit mars të këtij viti. Ajo ishte duke fjetur kur u zgjua dhe e pa bashkëshortin duke e goditur me thikë. Si pasojë e sulmit, gruaja mori pesë plagë.
Pas ngjarjes, Finch qëndroi në vendin e krimit për rreth 30 minuta para se të telefononte shërbimet emergjente, duke u thënë operatorëve se kishte “tentuar ta vriste” bashkëshorten. Gruaja u dërgua me urgjencë në spital, ku iu nënshtrua një operacioni që i shpëtoi jetën.
I dyshuari u arrestua në vendngjarje dhe më pas pranoi fajësinë për veprën penale të tentim-vrasjes. Gjatë seancës gjyqësore, viktima theksoi se sulmi kishte shkatërruar jetën dhe familjen e saj.
Ajo shprehu shqetësim për momentin kur po goditej me thikë, duke menduar: “Pse po e bënte këtë? Mendoja se më donte.” Ajo theksoi se para sulmit ishte në proces rikuperimi nga një operacion dhe ishte në gjendje të kryente disa aktivitete vetë, por tani është e detyruar të qëndrojë në shtrat dhe ka nevojë për ndihmë të vazhdueshme.
“Plagët do të shërohen dhe shenjat do të zbehen, por kujtimi do të mbetet gjithmonë. Tani duhet të mësoj të jetoj me një zemër të thyer,” përfundoi viktima.
78-vjeçari Finch u dënua nga Gjykata e Kurorës në Teesside me tetë vjet e tetë muaj burgim.
You must be logged in to post a comment Login