Qendra Evropiane për Parandalimin dhe Kontrollin e Sëmundjeve (ECDC) ka raportuar se 139 raste të infeksionit janë regjistruar në Itali, ndërsa në Greqi janë konfirmuar 61 raste. Infeksione të tjera janë evidentuar edhe në Spanjë, me 17 raste të raportuara, dhe në Maqedoninë e Veriut, ku janë regjistruar 13 raste. Po ashtu, Rumania ka 6 raste, Franca 4 dhe Gjermania ka raportuar një rast.
Për këtë vit, më shumë se 240 persona në Evropë janë konfirmuar të infektuar me virusin e Nilit Perëndimor. Sipas një raporti të publikuar të premten nga ECDC, nga fillimi i sezonit të transmetimit deri në fund të javës së kaluar, janë regjistruar gjithsej 241 raste.
Në fund të muajit të kaluar, Organizata Botërore e Shëndetësisë (OBSH) u bëri thirrje vendeve europiane të rrisin vigjilencën, pas raportimit të disa rasteve të etheve të Nilit Perëndimor në Evropën Jugore. Sipas OBSH-së, virusi zakonisht transmetohet nga mushkonjat dhe zogjtë. Megjithatë, mushkonjat e infektuara mund të pickojnë dhe të infektojnë njerëzit, veçanërisht midis korrikut dhe shtatorit. Shumica e individëve të infektuar shpesh as nuk e dinë se e kanë virusin.
Instituti Robert Koch (RKI) në Gjermani vëren se shumica e personave të infektuar shpesh nuk janë të vetëdijshëm për gjendjen e tyre, duke sugjeruar se ka një numër të konsiderueshëm të rasteve të pa raportuara.
Në rastet më të rënda, sëmundja mund të ndikojë në sistemin nervor dhe të shkaktojë gjendje si encefaliti dhe meningjiti. Momentalisht, nuk ka vaksinë ose kurë për këtë virus; mjekët mund të menaxhojnë vetëm simptomat.
OBSH-ja u rekomandon udhëtarëve të marrin masa për të reduktuar rrezikun nga pickimet e mushkonjave, duke u veshur me rroba të përshtatshme dhe duke përdorur repelentë.
You must be logged in to post a comment Login