Gjykata Supreme ka shpallur të pafajshme instrumentaren e Klinikës së Neurokirurgjisë në QKUK, F.P., e cila ishte akuzuar për tentativën e përvetësimit të 11 klipave mjekësorë në vlerë prej 2,750 eurosh gjatë dhjetorit të vitit 2023.
Në vendimin e saj, Supremja rrëzoi vendimet e Gjykatës Themelore dhe Apelit, duke konstatuar se nuk ishin paraqitur prova materiale apo dëshmi të besueshme që të vërtetonin se F.P. kishte hedhur klipat në shportën e mbeturinave.
Drejtori i Klinikës së Neurokirurgjisë, Besnik Elshani, e ka mohuar akuzën për kërcënim, presion dhe ngacmim seksual ndaj instrumentares. Ai theksoi se ajo ishte thirrur për biseda vetëm për çështje pune dhe mungesën e materialeve të nevojshme. Edhe neurokirurgu Berat Kerolli ka hedhur poshtë akuzat ndaj tij, duke deklaruar se F.P. ishte parë si person i dyshuar për humbje të materialeve.
Përveç këtij rast penal, F.P. ka paditur edhe Shërbimin Shëndetësor të Kosovës (ShSKUK), duke pretenduar se pas incidentit me klipet i ishte ndryshuar vendi i punës katër herë pa pëlqimin e saj dhe se ishte degraduar profesionalisht. Ajo kërkon që gjykata ta rikthejë në pozitat ku kishte punuar për rreth 23 vjet.
You must be logged in to post a comment Login