Kryetari i Drenasit, Ramiz Lladrovci, ka reaguar lidhur me situatën në Kuvendin e Kosovës, duke shprehur një kritikë të ashpër për zhvillimet e fundit. Ai ka rikujtuar deklaratat e mëhershme të Albin Kurtit për shkeljet kushtetuese.
Lladrovci citon një deklaratë të Kurtit nga periudha kur ai ishte në opozitë, në të cilën ai pohonte se “shkelësit e ligjit janë kriminelë, ndërsa shkelësit e Kushtetutës janë superkriminelë”. Sipas Lladrovcit, sot Kurti dhe partia e tij kanë rënë në një situatë të ngjashme me atë që dikur e kritikuan.
“Shkelësit e ligjit janë kriminelë, shkelësit e Kushtetutës janë superkriminelë,” kujton Lladrovci fjalët e Kurtit nga e kaluara. Ai shton se opozitari i dikurshëm tani ka shkelur Kushtetutën, por duket se nuk ndihet si “superkriminel”.
Lladrovci vlerëson se vendi ka hyrë në një situatë politike të paprecedentë dhe kërkon që veprimet politike të zhvillohen brenda kuadrit kushtetues. “Veprimet politike janë të arsyetuara vetëm kur janë në përputhje me rregullat dhe normat,” ka thënë ai.
Ai gjithashtu e ka theksuar rëndësinë e afatit për konstituimin e Kuvendit, argumentuar se një tejkalim i këtij afati përbën shkelje të kushtetutës. “Situata është qartë e përcaktuar rreth afatit të konstituimit të Kuvendit, dhe çdo tejkalim është një shkelje e pastër kushtetuese,” ka deklaruar Lladrovci.
Ai propozon që çështja duhet të dërgohet në Gjykatën Kushtetuese, për të përcaktuar jo vetëm afatin, por edhe pasojat në rast të mosrespektimit të tij. “Seanca konstituive është çështje kushtetuese, dhe dhjetë e më shumë deputetë duhet t’i mbledhin nënshkrimet për ta dërguar këtë çështje në Gjykatën Kushtetuese,” ka sqaruar ai.
Në fund, Lladrovci ka komentuar edhe veprimin e deputetes Time Kadrijaj gjatë ngjarjeve në Kuvend. Ai e ka vlerësuar veprimin e saj si një rikujtesë për rrugën që solli fryte politike partisë në pushtet, duke aluduar se kjo situatë është gjithashtu e rëndësishme për reflektim.
You must be logged in to post a comment Login