Kryetarët e komunave të Kosovës kanë njoftuar për një protestë para Qeverisë Kurti në muajin shtator. Kjo protestë do të shërbejë për të shprehur kundërshtimin ndaj, siç pretendojnë ata, bllokimit të mjeteve financiare dhe pengimit të projekteve komunale nga pushteti qendror.
Kryetari i Prishtinës, Përparim Rama, shprehu këtë qëndrim përmes një postimi në rrjetet sociale. Ai theksoi se të gjithë kryetarët e komunave janë bashkuar për të kundërshtuar “shkeljen e vazhdueshme të ligjit” dhe qasjen që e sheh si “totalitare” të qeverisë ndaj pushtetit lokal.
Rama theksoi se paralajmërimi i bëri gjatë fushatës zgjedhore, ku u pohua se komunave që nuk qeverisen nga Lëvizja Vetëvendosje nuk do t’u jepet buxhet, tani po materializohet përmes bllokimit të mjeteve, pengimit të projekteve dhe ndëshkimit financiar të këtyre komunave.
Sipas tij, që nga viti 2022, komunave u janë marrë mbi 344 milionë euro për obligime që nuk i kanë krijuar vetë. Ai deklaroi se po bllokohen mjete dhe pengohen investime që u takojnë qytetarëve. Rama beson se po përpiqen të nënshtrinë pushtetin lokal përmes presionit financiar dhe politik.
Ai theksoi se komunat duhet të trajtohen pa marrë parasysh përkatësinë politike të udhëheqjes së tyre. “Komunat nuk janë të kryetarëve! Komunat janë të qytetarëve!”, shkroi ai.
Në përfundim, ai nënvizoi se nëse Qeveria bllokon një komunë për shkak të udhëheqjes së saj, pasojat nuk i bart vetëm kryetari, por qytetarët e asaj komune. “Kur Qeveria bllokon një komunë vetëm sepse nuk e qeveris Vetëvendosje, nuk po lufton një kryetar. Po ia mohon qytetarit një rrugë, një çerdhe, një shkollë apo një shërbim vetëm për shkak të mënyrës se si ai ka votuar”, përfundoi Rama.
You must be logged in to post a comment Login