KQZ përmbylli numërimin – Aleanca me shtatë ulëse në Kuvend

Në ditën e dhjetë pas mbajtjes së zgjedhjeve të parakohshme parlamentare, Komisioni Qendror i Zgjedhjeve (KQZ) ka përmbyllur procesin e numërimit të të gjitha fletëvotimeve.

Të enjten, në mëngjes, do të fillojë rinumërimi i fletëvotimeve nga 185 vendvotime nga gjithsej 2,498.

Sipas rezultateve të publikuara nga KQZ, Aleanca ka siguruar shtatë ulëse në legjislaturën e 11-të të Kuvendit të Kosovës. Kandidatet e këtij subjekti politik që fituan mandatet e deputetëve janë Ardian Gjini, Ramush Haradinaj, Daut Haradinaj, Besnik Tahiri, Time Kadrijaj, Albana Bytyqi dhe Teuta Haxhiu.

Pas përfundimit të numërimit, KQZ ka njoftuar se palët kanë të drejtë të parashtrojnë ankesa lidhur me administrimin në Qendrat Komunale të Numërimit dhe Qendrën e Numërimit dhe Rezultateve. Ankesa mund të bëhet brenda 48 orëve nga ndodhja e shkeljes së supozuar.

Zëdhënësi i KQZ-së, Valmir Elezi, ka shpjeguar se për administrimin e numërimit në ditën e fundit, ankesat mund të dorëzohen me shkrim në Panelin Zgjedhor për Ankesa dhe Parashtresa.

Ai theksoi: “Në rast se brenda 48 orëve nuk ka ankesa lidhur me administrimin e numërimit, KQZ është e gatshme për të proceduar me shpalljen e rezultateve përfundimtare. Nëse do të ketë ankesa, KQZ do të presë vendimmarrjen e institucioneve përkatëse dhe do të zbatojë vendimet e tyre nëse e obligojnë, vetëm atëherë do të shpallen rezultatet përfundimtare.”