Ministri në detyrë i Punëve të Jashtme, Glauk Konjufca, në një konferencë të përbashkët me ministrin e deleguar për Evropën nga Republika e Francës, Benjamin Haddad, theksoi rëndësinë e Francës si një partner strategjik për vendin.
Ai shprehu kënaqësinë që, gjatë kësaj vizite, bashkë me ministrin francez nënshkruan katër marrëveshje të rëndësishme për Kosovën. Konjufca e konsideroi këtë moment si një tregues të marrëdhënieve të shkëlqyera ndërmjet dy vendeve, duke e përshkruar vizitën e Haddad si një dëshmi të bashkëpunimit të frytshëm.
“Është kënaqësi e veçantë që e mirëprita sot në Ministrinë tonë,” u shpreh ai, duke theksuar se Kosova dhe Franca ndajnë një vizion të përbashkët për një Europë më të sigurt dhe të fortë.
Gjatë takimit dypalësh, të dy ministrat diskutuan për fuqizimin e marrëdhënieve mes dy vendeve. Konjufca theksoi se Kosova ka bërë zgjedhjen e saj strategjike, duke shprehur se “zgjedhja jonë është Evropa, Bashkimi Evropian.”
Ai gjithashtu komentoi mbi provokimet e Serbisë, duke theksuar se paqja nuk mund të arrihet mbi mohimin e së kaluarës, por vetëm nëpërmjet njohjes së së vërtetës. “Kosova po investon në sigurinë e vendit dhe të rajonit, gjithmonë në raport me vendet tona aleate,” tha ai, duke theksuar përkushtimin për paqe, bashkëpunim rajonal dhe ruajtjen e vlerave.
Sa i përket rrugëtimit të Kosovës drejt Bashkimit Evropian, Konjufca nënvizoi se Franca mbetet një partner kyç në këtë proces.
You must be logged in to post a comment Login