Konflikti për tokë përfundon me plagosje, si erdhi deri tek incidenti mes axhës dhe nipit? (VIDEO)

Një incident i rëndë ka ndodhur mbrëmjen e kaluar në Mirad të Epërme, në Fushë Kosovë, ku një person është plagosur nga arma e zjarrit.

Sipas informatave të para, ngjarja ka ndodhur kur një individ ka qëlluar drejt axhës së tij, duke e plagosur në këmbën e djathtë. Dyshimet e para tregojnë se konflikti është rrjedhojë e një mosmarrëveshjeje familjare lidhur me çështje pronësore, më konkretisht për një tokë.

Gazetarja e Klan Kosovës, Diellza Berisha, raportoi nga vendi i ngjarjes se policia vazhdon të ndodhet pranë shtëpive të viktimës dhe të dyshuarit, aty ku ka ndodhur incidenti. Ajo citoi një familjar të dorasit, i cili shpjegoi se konflikti ka lindur për shkak të një presioni mbi token, si dhe se një person ka ardhur nga jashtë, duke pretenduar se toka është e tij.

I dyshuari, pas incidentit, është larguar me një veturë, që më pas është gjetur pranë shtëpisë së vëllait të tij. Aktualisht, ai ende nuk është lokalizuar nga policia.

Në vendin e ngjarjes kanë dalë njësitë policore, ekipet hetuese dhe prokurori nga Departamenti i Krimeve të Rënda. Gjatë hetimeve, është gjetur një gëzhojë plumbi, e cila dyshohet se lidhet me armën e përdorur në rast.

Viktima është jashtë rrezikut për jetë dhe është duke marrë trajtim mjekësor. Ai është intervistuar nga policia, ndërsa më herët janë marrë edhe deklarata nga anëtarët e familjes të përfshirë në incident. Hetimet për zbardhjen e rrethanave të ngjarjes po vazhdojnë.