Kapet në Jarinjë i dyshuari për falsifikim dokumentesh, i gjenden 45 fishekë

Policia ka arrestuar sot në Jarinjë një person të dyshuar për “Falsifikim të dokumenteve”.

Sipas një njoftimi, i dyshuari, i identifikuar me inicialet I.S. dhe i lindur në vitin 1985, është ndaluar nga zyrtarët e Drejtorisë për Hetimin e Krimit të Organizuar dhe Krimeve të Rënda. Arrestimi u realizua si pjesë e hetimeve për një rast të mëhershëm.

Pas arrestimit, me urdhër të prokurorit kujdestar, është kryer një kontroll në shtëpinë e të dyshuarit në Leposaviq, siç raporton Klankosova.tv.

Gjatë këtij kontrolli, policia ka sekuestruar 45 fishekë të kalibrave të ndryshëm, si dhe disa pjesë të uniformës. Po ashtu, është marrë si provë materiale në lidhje me rastin e falsifikimit të dokumenteve një telefon personal i tipit Redmi 5G.

Pas intervistimit në prani të avokatit mbrojtës, i dyshuari është dërguar në ndalim prej 48 orësh me vendim të prokurorit.