Haradinaj: Pa marrëveshje opozitare, Kosova do të vazhdojë të jetojë në “epokën Kurti”

Ish-kryetari i Aleancës për Ardhmërinë e Kosovës, Ramush Haradinaj, ka shprehur shqetësimin se opozita nuk ka arritur të krijojë një marrëveshje të përbashkët politike, asnjë kandidat të unifikuar. Në këtë kontekst, ai thekson se vendi do të vazhdojë të udhëhiqet nga agjenda e Lëvizjes Vetëvendosje dhe kryeministrit në detyrë, Albin Kurti.

Haradinaj ka theksuar se vetëm një bashkim i opozitës, i bazuar në një kontratë të qartë dhe me një kandidat të përbashkët për president, mund të sjellë ndryshime në situatën politike aktuale. Ai vlerëson se Kosova po jeton në një “epokë Kurti”, ku kryeministri zbaton agjendën e tij, sidomos kur ka mbështetje të madhe në parlament.

Sipas tij, mungesa e një alternative të organizuar opozitare i jep mundësi Kurtit të vazhdojë me politikat e tij dhe ta çojë vendin sërish në zgjedhje. Ai shprehet se, derisa opozita të mos arrijë një marrëveshje të përbashkët dhe të ofrojë një kontratë, vendi do të mbetet nën ndikimin e agjendës së Kurtit.

Haradinaj gjithashtu diskutoi për mundësinë e zgjedhjes së presidentit, duke thënë se opozita mund të bëhet një faktor vendimtar nëse arrin të bashkohet. Ai është i mendimit se, nëse ndonjë kandidat nga opozita merr mbështetje, do ta mbështeste atë, por sqaroi se aktualisht nuk është kandidat dhe nuk ka kërkesa për askënd.

Ai përfundoi duke theksuar se, për aq kohë sa Lëvizja Vetëvendosje të mos bjerë nën 40%, vendi do të vazhdojë të përballet me “eksperimentin Kurti”. Sipas tij, opozita duhet të bashkohet për të ndaluar këtë situatë.