Në qarkun e Shkodrës janë asgjësuar 2098 bimë dhe fidanë kanabisi si pjesë e operacionit policor të quajtur “Territor i Pastër”. Gjatë këtij operacioni, janë arrestuar dy persona dhe një kryeplak është proceduar penalisht.
Gjatë kontrolleve në njësinë administrative Shosh, konkretisht në fshatin Ndrejaj, shërbimet e Policisë gjetën 768 bimë të dyshuara narkotike cannabis sativa. Në vendin e ngjarjes, u arrestua P.M., 53 vjeç, banues në Ndrejaj. Po ashtu, gjatë kontrollit në banesën e tij, u gjetën dhe u konfiskuan 80 kubikë me fidanë të dyshuar cannabis sativa.
Në një tjetër operacion në fshatin Vukël, që i përket njësisë administrative Kelmend, u zbuluan 1250 bimë të dyshuara cannabis sativa. Në këtë rast, u arrestua në flagrancë A.Ç, 52 vjeç, për veprën penale të “Moskallëzimit të krimit”.
Gjithashtu, Policia ka nisur procedim penal ndaj K. B., 65 vjeç, kryeplak i fshatit Vukël, i cili ndodhet në gjendje të lirë.
Të gjitha bimët dhe fidanët e sekuestruar janë asgjësuar në vend nëpërmjet djegies. Materialet e procedurës janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme.
Policia njofton se kontrollimet për parandalimin dhe goditjen e kultivimit të bimëve narkotike do të vazhdojnë në të gjithë territorin e qarkut Shkodër.
Be the first to comment