Gjenerali amerikan Eric Wendt është konfirmuar nga Senati i Shteteve të Bashkuara si ambasador në Shqipëri. Ai ka marrë miratimin përfundimtar për këtë detyrë diplomatike me 51 vota pro dhe 47 kundër.
Votimi në seancën plenare pason miratimin e mëparshëm në komisionin përkatës të Senatit, ku kandidatura e tij gjeti mbështetje nga shumica e anëtarëve. Më herët, Wendt kishte marrë mbështetje edhe nga Komiteti për Marrëdhëniet me Jashtë i Senatit Amerikan me një votim 19-3, që hapi rrugën për miratimin final.
Me këtë votim, procedura e konfirmimit është përfunduar, dhe pritet që ambasadori të fillojë detyrën në ditët në vijim, sipas afateve të caktuara nga administrata amerikane.
Wendt ka një karrierë të gjatë që përfshin më shumë se tri dekada në ushtri dhe struktura ndërkombëtare të sigurisë. Ai është oficer i pensionuar i Ushtrisë së Shteteve të Bashkuara, me mbi 34 vjet shërbim aktiv.
Gjatë karrierës së tij, ai ka shërbyer si komandant i Komandës së Operacioneve Speciale të NATO-s dhe ka mbajtur poste kyçe në Lindjen e Mesme dhe rajonin e Paqësorit. Po ashtu, ka qenë koordinator i Sigurisë i SHBA-së për Autoritetin Izraelito-Palestinez gjatë periudhës 2017–2019, si dhe shef i Shtabit në Komandën e Paqësorit të SHBA-së.
Wendt është diplomuar në Universitetin e Kalifornisë në Santa Barbara dhe ka përfunduar studimet pasuniversitare në fushën e sigurisë kombëtare në Shkollën Pasuniversitare.
You must be logged in to post a comment Login