Një zjarr i madh ka përfshirë një ndërtesë shumëkatëshe në Thusis, në kantonin Graubünden të Zvicrës, duke shkatërruar plotësisht një restorant dhe disa banesa.
Sipas Policisë Kantonale të Graubünden, zjarri u raportua pak pas mesnatës dhe dyshohet se ka nisur në katin e dytë të ndërtesës. Shkallët e ndërtesës janë shembur, duke e vështirësuar ndihmën për ekipet e emergjencës, siç njofton Bild.
Me ndihmën e ekipeve të shpëtimit, 14 persona arritën të largoheshin nga ndërtesa. Sidoqoftë, tetë prej tyre kanë pësuar lëndime, ndërsa dy janë në gjendje të rëndë dhe janë dërguar në spital.
Gjithashtu, pesë persona vazhdojnë të konsiderohen të zhdukur. Rreth 100 zjarrfikës nga rajoni janë angazhuar për shuarjen e zjarrit, që ka vazhduar edhe gjatë mëngjesit të së premtes.
Shkaqet e zjarrit ende nuk janë përcaktuar. Policia Kantonale, në bashkëpunim me Prokurorinë, ka nisur hetimet për të zbuluar burimin e këtij incidenti tragjik.
You must be logged in to post a comment Login