Sulmuesi i Kombëtares së Kosovës pritet të mbërrijë sonte në Stamboll për të përfunduar procedurat e fundit të transferimit. Klubi turk, Fenerbahçe, ka arritur një marrëveshje në parim me Mallorcan për rikthimin e tij.
Fenerbahçe ka konfirmuar këtë informacion nëpërmjet një njoftimi zyrtar, duke theksuar se 31-vjeçari do të udhëtojë drejt Turqisë për t’u nënshtruar ekzaminimeve mjekësore dhe për të finalizuar detajet e kontratës. “Klubi ka arritur marrëveshje në parim për transferimin e Vedat Muriqit dhe lojtari do të mbërrijë në Stamboll për kontrollet mjekësore dhe përfundimin e negociatave,” thuhet në njoftimin e klubit.
Sipas informacioneve të publikuara, avioni që transporton sulmuesin kosovar pritet të ulet në Aeroportin Sabiha Gokçen, në terminalin e fluturimeve ndërkombëtare, rreth orës 21:00.
Pas kryerjes së testeve mjekësore dhe përfundimit të dokumentacionit, Fenerbahçe pritet të zyrtarizojë transferimin. Klubi është i angazhuar për rikthimin e një prej futbollistëve që ka lënë gjurmë të rëndësishme gjatë aventurës së tij të parë në klub, sipas njoftimit të klubit turk.
Muriqi ishte ndër lojtarët më të spikatur të Fenerbahçes para transferimit të tij në Itali. Ai tani rikthehet në Stamboll pas periudhës së kaluar te Mallorca, ku është shndërruar në një figurë kyçe të skuadrës spanjolle.
Nëse gjithçka shkon sipas planit, sulmuesi kosovar do të nisë një kapitull të ri me fanellën verdheblu, duke u ribashkuar me një klub që vazhdon të gëzojë respekt të madh nga tifozët.
You must be logged in to post a comment Login