Eklipsi i plotë diellor ka potencialin të ndikojë në sjelljen e kafshëve, duke shkaktuar reagime të pazakonta. Nga breshkat që fillojnë të çiftëzohen në mes të ditës, te gjirafat që vrapojnë në mënyrë kaotike, fenomeni duket se ka efekte të dukshme.
Gjatë eklipsit të vitit 2017 në Shtetet e Bashkuara, studiuesit vëzhguan sjelljen e 17 llojeve të kafshëve, duke evidentuar 13 ndryshime të spikatura. Një nga rastet më të veçanta ishte ai i breshkave të Galapagos, të cilat zakonisht qëndrojnë në diell gjatë ditës. Sapo nisi eklipsi, ato filluan të çiftëzoheshin, një sjellje e papritur për këtë periudhë.
Ndërkohë, gjirafat u alarmuan dhe filluan të vraponin të frikësuara, ndërsa gorillat u mblodhën së bashku, duke u sjellë si në përgatitje për gjumin e natës. Disa lloje majmunësh gjithashtu prodhuan tinguj të pazakontë gjatë kësaj periudhe.
Studiuesit vunë re ndryshime edhe në sjelljen e zogjve. Disa prej tyre filluan të këndonin si në agim, ndërsa të tjerët heshtën gjatë errësirës, duke rifilluar pas rikthimit të dritës.
Megjithatë, ekspertët theksojnë se këto sjellje kthehen në normalitet pak minuta pas përfundimit të eklipsit. Pjesa më e madhe e vëzhgimeve mbetet kryesisht anekdotike nga pikëpamja shkencore.
You must be logged in to post a comment Login