Dorëheqja e gazetares, Kusari për RTK-në: Transmeton propagandë në favor të Vetëvendosjes

Juristja e mediave, Flutura Kusari, ka reaguar pas dorëheqjes së gazetares Arlinda Sejda nga Radio Televizioni i Kosovës (RTK).

Ajo sugjeron se RTK duhet të ndryshojë emrin, duke e quajtur atë Radio Televizion të Lëvizjes Vetëvendosje. Në një postim në Facebook, ku ndau një fotografi me Sejdën, Kusari theksoi se ky televizion tani ka një mision të vetëm: të transmetojë propagandë në favor të Lëvizjes Vetëvendosje dhe njerëzve të saj.

Kusari deklaroi se takoi Arlindën për të shprehur solidaritetin e saj dhe e përgëzoi për vendimin e marrë, duke e cilësuar dorëheqjen si një nga vendimet më të vështira, veçanërisht pas një dekade angazhimi në këtë punë. Ajo e shprehu vendosmërinë për të dokumentuar këtë rast, që e sheh si një akt të terrorit politik në RTK, në çdo platformë vendore, rajonale, ndërkombëtare dhe globale.

Në fund, ajo kritikoi Lëvizjen Vetëvendosje, duke shprehur një ndjenjë turpi për situatën.