Dogana e Kosovës ka sekuestruar 2,550 fishekë të kalibrit 9 milimetra, të cilët ishin fshehur në bunkerë të ndërtuar brenda një automjeti të ndaluar në autostradën Trudë-Prishtinë.
Sipas njoftimit zyrtar, ky aksion është realizuar nga zyrtarët e Sektorit Antikontrabandë gjatë aktiviteteve operative për luftimin e kontrabandës dhe krimit ndërkufitar. Automjeti, i dyshimtë në këtë rast, është ndaluar për kontroll doganor në rajonin e Prishtinës.
Gjatë kontrollit fillestar, zyrtarët ngritën dyshime për ekzistencën e hapësirave të modifikuara në automjet. Pas një kontrolli të detajuar, ata zbuluan bunkerë të ndërtuar pas fabrikimit, ku ishin fshehur fishekët.
Pas përfundimit të procedurave, automjeti, municioni dhe personi i dyshuar janë dorëzuar në Policinë e Kosovës. Kjo e fundit ka nisur hetimet për zbardhjen e plotë të rastit, në përputhje me kompetencat ligjore.
You must be logged in to post a comment Login