Ambasadori i Kosovës në Bruksel dhe kryenegociatori i Kosovës në dialogun me Serbinë, Agron Bajrami, ka adresuar një letër zyrtare dërguarit të Bashkimit Evropian për dialogun, Peter Sorensen. Në këtë letër, ai kërkon një reagim ndaj deklaratës së ministres serbe Snezhana Paunoviq, e cila përmendi mbështetje të hapur për spastrimin etnik të shqiptarëve në Kosovë.
Bajrami thekson se deklarata e ministres është një refleksion i qëndrimit të presidentit të Serbisë, Aleksandar Vuçiq. Ai shton se dallimi kryesor është se Paunoviq e bëri këtë deklaratë me zë të lartë, ndërsa Vuçiq tani po përpiqet të minimizojë pasojat e saj.
Ai shprehet se “ministrja serbe tha atë që mendon presidenti serb – ajo thjesht nuk duhej ta kishte thënë me zë të lartë, ndërsa ai tani përpiqet të kontrollojë dëmet.”
Bajrami vlerëson se deklarata të tilla, së bashku me sjelljen e zyrtarëve serbë, shkelin Marrëveshjen e Brukselit nga viti 2023. Kjo marrëveshje obligon të dyja palët të tejkalojnë trashëgiminë e së kaluarës dhe të respektojnë integritetin territorial, sovranitetin dhe paprekshmërinë e kufijve.
Ai paralajmëron se një retorikë e tillë dëmton dialogun e ndërmjetësuar nga Bashkimi Evropian, minon besimin ndërmjet palëve dhe cenon procesin e normalizimit të marrëdhënieve.
Bajrami vazhdon duke thënë se distancimi i autoriteteve serbe nga deklarata e ministres përfaqëson vetëm “premtime boshe,” dhe jo një pendim të sinqertë apo refuzim të krimeve të kryera gjatë regjimit të Sllobodan Millosheviqit.
Në përfundim, ai e rithekson angazhimin e Kosovës ndaj procesit të dialogut, por thekson se kjo është e mundur vetëm nëse respektohen vazhdimisht parimet mbi të cilat bazohet dialogu. Ai pyet: “Çfarë vlere ka të flasësh për zbatim kur Serbia vazhdon t’i shkelë marrëveshjet me fjalë dhe me vepra?”
Be the first to comment