Dalin pamje nga dasma përrallore e Taylor Swift

Ylli botëror i popit, Taylor Swift, dhe lojtari i njohur i futbollit amerikan, Travis Kelce, u martuan zyrtarisht më 3 korrik në një ceremoni grandioze të mbushur me yje. Pamjet nga ky aheng tani po bëjnë xhiron e rrjetit, duke zbuluar detaje magjike nga ngjarja më e përfolur e vitit.

Ceremonia dyditore u zhvillua në qendër të Nju Jorkut dhe ishte e zbukuruar në stilin “fairytale”. Ambienti brenda ishte transformuar në një kopsht përrallor, i mbushur me lule, duke krijuar një atmosferë të ngrohtë dhe magjike.

Për të ruajtur privatësinë, çifti zgjodhi të mos kishte një numër të madh shoqëruesish. Vëllai i Taylor, Austin Swift, e shoqëroi nusen si “shoqërues nderi,” ndërsa ish-futbollisti Jason Kelce shërbeu si dëshmitar i dhëndrit. Ceremonia u udhëhoq nga komiku i njohur Adam Sandler.

Sipas menaxheres së marrëdhënieve me publikun të Swift, Tree Paine, të sapomartuarit ishin veshur me kreacione ekskluzive nga Jonathan Anderson, drejtori kreativ i shtëpisë së modës Dior. Ky shënonte fustanin e parë nusërie “couture” të krijuar për një personazh të këtij kalibri. Këpucët e tyre u realizuan me porosi nga Christian Louboutin, ndërsa Taylor kishte veshur bizhuteri luksoze nga Cartier.

Më pas, pas përfundimit të ceremonisë, ekranet gjigante jashtë arenës Madison Square Garden u ndriçuan në nuancat e lejlasë dhe shfaqën mesazhin “JUST MARRIED”. Lokacioni i këtij eventi, me kapacitet prej 20,000 vendesh, u konsiderua i nevojshëm për nivelin e privatësisë që ofron, megjithatë çmimi i qirasë mendohet se ka arritur dhjetëra miliona dollarë.

Eventi mblodhi elitën e botës së artit dhe sportit, me rreth 1,000 të ftuar, ku u panë emra të njohur si Hugh Grant, Jason Sudeikis, Bradley Cooper dhe Ethan Hawke. Pjesëmarrësit përfshinin gjithashtu supermodelen Gigi Hadid me Cooper, Karlie Kloss me Joshua Kushner, aktoren Dakota Johnson dhe prezantuesin Graham Norton.

Pavarësisht temperaturave të larta, që arritën deri në 37°C, mijëra fansa zunë rrugët përreth arenës duke kënduar hitet e Swift, duke detyruar Policinë e Nju Jorkut të mbyllte qarkullimin në Midtown Manhattan.

Dhe ndërsa festa konsiderohet si një nga më të mëdhatë të dekadës, çifti bujar tregoi një anë të veçantë duke dhuruar 26 milionë dollarë për më shumë se 20 organizata bamirësie, para se të kurorëzonin dashurinë e tyre.