Një burrë ka humbur jetën sonte në Ferizaj, në rezultat të një përleshjeje, ku dyshohet se është përdorur armë zjarri. Ngjarja ndodhi rreth orës 22:50 në rrugën “Sejdi Sejdiu”.
Zëdhënësi i policisë për rajonin e Ferizajt, Kanun Veseli, konfirmoi për Klankosova.tv se menjëherë pas incidentit janë mobilizuar njësitet përkatëse policore.
Veseli theksoi se në vendngjarje është gjetur një person mashkull i moshës madhore pa shenja jete, i cili dyshohet se kishte marrë plagë nga arma. Vdekja e tij është konfirmuar nga ekipi mjekësor i Spitalit të Ferizajt.
Sipas hetimeve fillestare, policia dyshon se vrasja ka ndodhur si pasojë e një përleshjeje. Aktualisht, organet e rendit kanë nisur hetimet për të sqaruar rrethanat e plota të këtij rasti.
Klankosova.tv ka siguruar pamje nga vendi i ngjarjes, ku fillimisht pati një përleshje që përfundoi me përdorimin e armës së zjarrit dhe humbjen e jetës së një personi.
