Një person është arrestuar nga Policia e Kosovës nën dyshimin për blerje votash në Graçanicë. Ky aksion u realizua nga Sektori për Hetimin e Krimeve të Rënda.
Sipas burimeve të besueshme, operacioni u zhvillua në fshatin Uglar, pas informacioneve se individë të caktuar po tentonin të ndikojnë në votuesit përmes ofertave dhe premtimeve materiale.
Hetimet e para tregojnë se Aleksandar Trajkovic dyshohet se ka kontaktuar qytetarë të ndryshëm dhe u ka ofruar përfitime materiale në këmbim të votës për subjektin politik “Lista Serbe”.
Gjatë veprimeve operative janë intervistuar dëshmitarë dhe janë mbledhur informacione që lidhin të arrestuarin me veprën penale “Dhënia ose marrja e ryshfetit në lidhje me votimin”.
Më tej, hetuesit realizuan kontroll në shtëpinë e të dyshuarit dhe në një lokal. Aty janë gjetur dhe sekuestruar materiale të lidhura me procesin e votimit, si dhe katër telefona mobilë që do t’i nënshtrohen ekzaminimeve të tjera.
Me vendimin e Prokurorit të Krimeve të Rënda në Prishtinë, ndaj të dyshuarit është caktuar masa e ndalimit për 48 orë.
Hetimet vazhdojnë për të zbuluar nëse janë të përfshirë edhe persona të tjerë dhe për të sqaruar rrethanat e plota të rastit.
Shënim: Të gjithë personat e përmendur në këtë artikull prezumohen të pafajshëm deri në shpalljen e fajësisë nga gjykata.
You must be logged in to post a comment Login