Komisioni Evropian ka njoftuar se anëtarësimi i Malit të Zi në Bashkimin Evropian do të ketë një kosto prej rreth 3 miliardë eurosh gjatë periudhës së ardhshme buxhetore të bllokut.
Sipas raportit nga Politiko, ky vend i Ballkanit Perëndimor synon të bëhet anëtar i BE-së deri në vitin 2028. Pas anëtarësimit, Mali i Zi pritet të përfitojë fonde nga subvencionet bujqësore dhe pagesat rajonale nga buxheti qendror i BE-së.
Një zyrtar i lartë i Komisionit, i cili foli përmedhënse, theksoi se kostoja e anëtarësimit do të rritej me rreth një euro për çdo tatimpagues në BE gjatë periudhës 2028-2034, duke e karakterizuar këtë si “një shpenzim shumë të vogël”.
Buxheti i ardhshëm i BE-së, i cili pritet të arrijë rreth dy trilionë euro, do të hyjë në fuqi në fillim të vitit 2028 dhe do të përfshijë rregullime për të mbuluar kostot e zgjerimit me anëtarë të rinj.
Komisioni ka paraqitur propozimin financiar për integrimin e Malit të Zi, i cili duhet të miratohet nga shtetet anëtare para nisjes së negociatave përfundimtare me Brukselin.
Presidentja e Komisionit Evropian, Ursula von der Leyen, e ka cilësuar këtë paketim financiar si një hap konkret drejt anëtarësimit të Malit të Zi në BE.
Mali i Zi, me rreth 600 mijë banorë, ka statusin e vendit kandidat për anëtarësim në BE që nga viti 2010. Megjithatë, zyrtarët e BE-së shprehin se anëtarësimi i plotë deri në fillim të vitit 2028 është një sfidë.
Sipas parashikimeve, Mali i Zi pritet të kontribuojë rreth 500 milionë euro në buxhetin e BE-së gjatë shtatë viteve të ardhshme, ndërsa do të përfitojë rreth 3.1 miliardë euro në fonde për bujqësi, zhvillim rural, migracion dhe rritje ekonomike.
Komisioni ka vlerësuar se kostoja neto e zgjerimit të BE-së në Ballkanin Perëndimor do të arrijë rreth 8 miliardë euro gjatë periudhës së ardhshme shtatëvjeçare. Përveç Malit të Zi, në procesin e negociatave janë dhe vende të tjera të rajonit, përfshirë Shqipërinë, Serbinë, Bosnje e Hercegovinën, Maqedoninë e Veriut dhe Kosovën.
Be the first to comment