Prokuroria Speciale e Kosovës ka ngritur aktakuzë ndaj S.S. për veprën penale “Krime lufte kundër popullsisë civile”, e lidhur me vrasjen e nëntë civilëve shqiptarë gjatë luftës në Kosovë.
Sipas Prokurorisë, ngjarja ka ndodhur më 6 prill 1999, në fshatin Reznik të Vushtrrisë. Në aktakuzë, S.S. dyshohet se, në bashkëpunim me pjesëtarë të tjerë të forcave serbe dhe me S.T., i cili tashmë është dënuar nga Gjykata Themelore në Prishtinë, mori pjesë në vrasjen e civilëve.
Prokuroria pretendon se viktimat u vranë gjatë një aksioni të forcave serbe në këtë fshat. Në aktakuzë përfshihen detaje të rënda për trajtimin e viktimave.
Sipas njoftimit të Prokurorisë Speciale, disa prej viktimave raportohet se janë djegur për së gjalli, ndërsa disa të tjera pas vrasjes.
Rasti është dërguar tashmë në procedurë gjyqësore, duke e kaluar S.S. përballë akuzave për krime lufte kundër popullsisë civile. Prokuroria ka theksuar se aktakuza është ngritur mbi bazën e dyshimeve për përfshirjen e të pandehurit në këto ngjarje.
You must be logged in to post a comment Login