Deputeti i Lidhjes Demokratike të Kosovës (LDK), Armend Zemaj, ka komentuar mundësinë e pjesëmarrjes së deputetëve të kësaj partie në seancën konstituive të thirrur nesër në Kuvend, me kërkesë të Partisë Demokratike të Kosovës (PDK).
Në emisionin “Edicioni Special” në Klan Kosova, Zemaj theksoi se deri tani nuk ka një vendim të Grupit Parlamentar të LDK-së për këtë pjesëmarrje. Ai shprehu se ka parë në media për këtë kërkesë, por kjo nuk nënkupton automatikisht që ata do të jenë të pranishëm, përderisa nuk kanë ende një vendim të harmonizuar.
“Jemi duke biseduar dhe duke e shqyrtuar situatën, sepse kjo çështje nuk mund të vazhdojë kështu pa një zgjidhje,” tha Zemaj, duke bërë të qartë se situata ka nevojë për një vendim nga grupi.
Ai gjithashtu kritikoi mënyrën e menaxhimit të seancës konstituive, duke iu referuar kryesuesit të saj, Avni Dehari. Zemaj theksoi se Dehari, duke përdorur të drejtën e tij si kryesues, ka bllokuar thirrjen për seancën kuvendore me qëllim zgjedhjen e kryetarit dhe nënkryetarëve të Kuvendit, duke e vonuar kështu konstituimin e Kuvendit të Republikës së Kosovës.
Detajet e tjera do të vijojnë të ndiqen nga media.
You must be logged in to post a comment Login